រាជធានីភ្នំពេញ៖ នៅថ្ងៃអង្គារ ៨រោច ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែមករា ឆ្នាំ២០២៥ ដោយទទួលការអនុញ្ញាតដ៏ខ្ពង់ខ្ពស់របស់ឯកឧត្តម កេីត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌, លោកជំទាវ សុន សុខាលីដា ប្រតិភូរាជរដ្ឋាភិបាល និងជាអគ្គនាយក នៃអគ្គនាយកដ្ឋានកិច្ចការអយ្យការ និងព្រហ្មទណ្ឌ បានអញ្ជើញជាអធិបតីក្នុងពិធីបើកសិក្ខាសាលា "ពិនិត្យឡើងវិញ និងឆ្លុះបញ្ចាំងជាមួយដៃគូ នៃកម្មវិធីអាស៊ាន-អូស្ដ្រាលីប្រឆាំងការជួញដូរមនុស្សនៅកម្ពុជា(ASEAN-ACT)”។ សិក្ខាសាលានេះ មានការចូលរួមពីតំណាងក្រសួង-ស្ថាប័នពាក់ព័ន្ធរួមមាន៖ ក្រសួងយុត្តិធម៌, បណ្ឌិត្យសភាភូមិន្ទយុត្តិធម៌កម្ពុជា, ក្រសួងកិច្ចការនារី, ក្រសួងការងារ និងបណ្តុះបណ្តាលវិជ្ជាជីវៈ, គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស, អគ្គស្នងការដ្ឋាននគរបាលជាតិ, តំណាងកម្ពុជាប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស(AICHR),​ ក្រសួងសង្គមកិច្ច អតីតយុទ្ធជន និងយុវនីតិសម្បទា, ក្រុមការងារក្រសួងមហាផ្ទៃទទួលបន្ទុកឧក្រិដ្ឋកម្មឆ្លងដែនក្នុងក្របខណ្ឌអាស៊ាន-កម្ពុជា(SOMTC) និងអង្គការមិនមែនរដ្ឋាភិបាលជាតិនិងអន្តរជាតិមួយចំនួនផងដែរ។ សិក្ខាសាលានេះធ្វើឡើងក្នុងគោលបំណងចម្បងចំនួន ៣ រួមមាន៖ ១.ពិនិត្យឡើងវិញ និងឆ្លុះបញ្ចាំងសកម្មភាពការងារនៃកម្មវិធី ASEAN-ACT​ និងប្រមូលទស្សនៈរបស់ដៃគូអំពីគុណភាពនៃកម្មវិធី និងវឌ្ឍនភាពក្នុងការសម្រេចបាននូវលទ្ធផលរយៈពេលមធ្យម ២.បង្ហាញ និងចែករំលែកចំណុចសំខាន់ៗនៃសមិទ្ធផលពីខែកក្កដា ដល់ខែធ្នូ ឆ្នាំ២០២៤ ព្រមទាំងបញ្ហាប្រឈមនានាក្នុងការអនុវត្ត។ ៣.ជំរុញការរៀនសូត្រ​ និងការយល់ដឹងសម្រាប់ការកែលម្អ ដើម្បីជូនព័ត៌មានរៀបចំផែនការការងារនៃកម្មវិធី ASEAN-ACT សម្រាប់ឆ្នាំ២០២៥-២០២៦។