រសៀលថ្ងៃសុក្រ ១៣រោច ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែមិថុនា ឆ្នាំ២០២៣ នៅបណ្ឌិត្យសភាភូមិន្ទយុត្តិធម៌កម្ពុជា, ឯកឧត្តមកេង សុម៉ារិទ្ធ រដ្ឋលេខាធិការក្រសួងយុត្តិធម៌ និងជាប្រធានក្រុមការងារបច្ចេកទេស ដើម្បីអនុវត្តផែនការប្រតិបត្តិ និងតារាងផែនការសកម្មភាពនៃគម្រោងអភិវឌ្ឍន៍វិស័យច្បាប់ និងយុត្តិធម៌ ជំហ៊ានទី៦ បានអញ្ជើញជាអធិបតីក្នុងកម្មវិធីបើកសិក្ខាសាលាស្តីពី “ច្បាប់រដ្ឋប្បវេណី” សម្រាប់សិស្សចៅក្រម និងសិស្សព្រះរាជអាជ្ញា ដែលត្រូវបានរៀបចំឡើងដោយក្រុមការងារបច្ចេកទេស ដើម្បីផ្សព្វផ្សាយ ពិភាក្សា និងចែករំលែកបទពិសោធន៍ច្បាប់រដ្ឋប្បវេណី និងនីតិវិធីរដ្ឋប្បវេណី ដោយអ្នកជំនាញការផ្នែកច្បាប់របស់ភ្នាក់ងារសហប្រតិបត្តិការអន្តរជាតិជប៉ុន (JICA) និងក្រុមគ្រូបង្គោលផ្នែករដ្ឋប្បវេណីនៃបណ្ឌិត្យសភាភូមិន្ទយុត្តិធម៌កម្ពុជា។ សូមបញ្ជាក់ថា សិក្ខាសាលានេះ គឺជាសិក្ខាសាលាលើកទី១ របស់ក្រុមការងារបច្ចេកទេស ដែលនឹងត្រូវធ្វើឡើងសម្រាប់រយៈពេលពេញមួយថ្ងៃ និងធ្វើការសិក្សា និងវិភាគសុីជម្រៅលើករណីសិក្សាគម្រូលើរឿងក្តី “ការខ្ចីបរិភោគ” ដោយផ្តោតលើទិដ្ឋភាពសំខាន់ចំនួន ២ រួមមាន៖ (១)-ការអនុវត្តជាក់ស្តែងច្បាប់រដ្ឋប្បវេណី និងនីតិវិធីរដ្ឋប្បវេណី និង (២)-ការពិភាក្សា និងពន្យល់អំពីអត្រាការប្រាក់ដែលច្បាប់បានកំណត់។