ប្ដូរភាសា :

ព័ត៌មាន និង​ព្រឹត្តិការណ៍

ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានអនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលអូស្ត្រាលី ឆ្នាំសិក្សា ២០២៣-២០២៤ ចំនួន ១៣រូប ចូលជួបសម្តែងការគួរសម និងទទួលយកអនុសាសន៍ណែនាំដ៏ខ្ពង់ខ្ពស់

    

    ទីស្តីការក្រសួងយុត្តិធម៌៖ នាព្រឹកថ្ងៃអង្គារ ៤កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៣ ខែឧសភា ឆ្នាំ២០២៣ នេះ, ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានអនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលអូស្ត្រាលី (Australia Awards) ឆ្នាំសិក្សា ២០២៣-២០២៤ ចំនួន ១៣រូប ចូលជួបសម្តែងការគួរសម និងទទួលយកអនុសាសន៍ណែនាំដ៏ខ្ពង់ខ្ពស់ពីឯកឧត្តមរដ្ឋមន្ត្រី ដើម្បីជាឧត្តមប្រយោជន៍នៅក្នុងការសិក្សារៀនសូត្រនាពេលខាងមុខនេះ។ ជំនួបនេះ ក៏មានការអញ្ជើញចូលរួមពីសំណាក់ ឯកឧត្តម និង លោក លោកស្រី ដែលជាថា្នក់ដឹកនាំ ព្រមទាំងមន្ត្រីរាជការនៃក្រសួងយុត្តិធម៌ មួយចំនួនផងដែរ។

    ក្នុងឱកាសនេះ ឯកឧត្តមរដ្ឋមន្ត្រី បានលើកឡើងថា កត្តាសន្តិភាពបានធ្វើឱ្យប្រទេសកម្ពុជាមានការអភិវឌ្ឍ ហើយក្នុងនោះដែរ ក៏បានផ្តល់ឱកាសដល់យុវជនកម្ពុជាអាចទទួលបានចំណេះដឹង និងការសិក្សាខ្ពស់។ ឯកឧត្តមរដ្ឋមន្ត្រី ក៏បានផ្តល់អនុសាសន៍ដល់និស្សិតជ័យលាភីទាំងអស់ត្រូវចាប់យកឱកាសមាសនេះ តាមរយៈការខិតខំសិក្សារៀនសូត្រ ក្រេបជញ្ជក់យកចំណេះដឹង និងបទពិសោធន៍ល្អៗនៅប្រទេសអូស្ត្រាលី ដើម្បីយកចំណេះដឹង និងបទពិសោធន៍ទាំងនោះ មកចូលរួមបម្រើជាផលប្រយោជន៍សង្គមជាតិកម្ពុជាវិញ។ បន្ថែមពីនេះ, ឯកឧត្តមរដ្ឋមន្ត្រី ក៏បានផ្តាំផ្ញើដល់និស្សិតជ័យលាភីត្រូវចេះរួមសាមគ្គី និងចេះជួយយកអាសារគ្នាទៅវិញទៅមក ដូចពាក្យស្លោកខ្មែរដែលបានលើកឡើងថា «នៅផ្ទះម្តាយទីទៃ នៅព្រៃម្តាយតែមួយ» ព្រមទាំងជូនពរដល់និស្សិតជ័យលាភីទាំងអស់ទទួលបានជោគជ័យក្នុងការសិក្សាផងដែរ។