នាព្រឹកថ្ងៃព្រហស្បតិ៍ ៤ រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែធ្នូ ឆ្នាំ២០២៤ ឯកឧត្តម ទឹម ស៊ីផា អនុរដ្ឋលេខាធិការ និងឯកឧត្តម សេង ពុទ្ធី ប្រធាននាយកដ្ឋានកិច្ចការច្បាប់ព្រហ្មទណ្ឌនៃក្រសួងយុត្តិធម៌ បានចូលរួមក្នុងកិច្ចប្រជុំពិនិត្យ និងពិភាក្សាបន្តលើសេចក្តីព្រាងអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងអធិការកិច្ច ក្រោមអធិបតីភាពដ៏ខ្ពង់ខ្ពស់ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។ កិច្ចប្រជុំបានពិនិត្យ និងសម្រេចឯកភាពគ្នាលើសេចក្តីព្រាងចុងក្រោយនៃអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងអធិការកិច្ចនេះ ដោយគ្រាន់តែធ្វើការកែសម្រួលនូវខ្លឹមសារមួយចំនួនប៉ុណ្ណោះ។ សេចក្តីព្រាងអនុក្រឹត្យនេះ នឹងត្រូវដាក់សម័យប្រជុំពេញអង្គគណៈរដ្ឋមន្ត្រី នៅពេលវេលាណាមួយ នាពេលខាងមុខនេះ ដោយពុំមានកិច្ចប្រជុំចង្អៀតអ្វីបន្ថែមទៀតនោះទេ។